聰明柒頭

Hello大家好! 我係聰明柒頭既明子醬。

開左呢個BLOG以黎, 第一次發表文章, 因為驚自己寫既野, 冇內容, 冇深度, 但今日諗通左, 我只係想透過呢個平台去抒發自己一D既感想, 去表達一D平時唔敢, 又或者係唔好意思用口講出黎既野, 哪怕係一位瀏覽既人都冇, 我只係想將生活既點滴記錄低, 留俾我將來去回味。而且我知道, 呢度我永遠都有一個忠實粉絲, 柒頭聰, 哈哈! 多謝你去聆聽我既內心世界喔!

今日我想分享下我最近既一啲體會。由細到大，我都好鍾意食野，小學個陣，日日炸雞脾炸牛丸（而家諗起都好想食：p）,所以我成日都俾人叫做肥妹仔。到升中之後，一知道有游水堂就即刻當堂嚇到瀨屎。就因為咁，我就開始左減肥既生涯，由一個128磅既肥妹仔減到108磅左右。雖然體重已經算標準，但上年開始想自己再瘦啲，對腳再靚啲，就做好多運動，極端地食好多健康既食物，時時刻刻都計算住卡路里，一食肥膩食物就會覺得guilty。

一年時間左右，就減到9x磅。雖然係瘦左落黎，但精神上俾左好大壓力自己，好驚自己會復肥。因為呢個原因，再加上工作上既壓力，身體開始出現毛病。其實呢個問題都發生左一段時間，但我一直冇去正視，因為我好驚，寧願唔去面對，等佢順其自然。（係咪好傻😅）

最近，愈來愈多問題發生，令我有一段時間進入崩潰既狀態（本來我就係一個好緊張既人）。但當我冷靜落黎之後，我真係明白到唔可以再俾自己咁樣落去，一生咁短，我要好好享受生命，享受生活！I need to change!!😬😬 

從今日起，我會係呢個平台分享下我既改變，希望透過呢個方法，令我有動力咁堅持行落去！🙆 希望大家多多支持小妹!！